Suðurlandsvegur

Fjórða banaslysið á Suðurlandsvegi

Suðurlandsvegur

Mynd: DV

Fjórir hafa látist í umferðarslysum á Suðurlandsvegi milli Reykjavíkur og Selfoss það sem af er þessu ári. Nú fyrr í dag lét karlmaður þar lífið, eftir að fólksbíll hans skall saman við vörubifreið. Alls eru banaslysin í ár orðin fjórtán talsins.

Samkvæmt upplýsingum frá Umferðarstofu er fjöldi banaslysa á Suðurlandsvegi nú í ár langt yfir meðaltali. Þar verða að meðaltali 1,2 banaslys á ári, en þau eru nú sem fyrr segir orðin fjögur talsins. Hlutfall þeirra sem hafa látist í umferðarslysum á Suðurlandsvegi af heildarfjölda þeirra sem látist hafa í bílslysum í ár er 28,8%. Hlutfallið er vanalega um 5%.

Að sögn Gunnars Geirs Gunnarssonar, hjá Umferðarstofu, er ljóst að þarna sé um einn versta veg landsins að ræða. Hann segir þetta að miklu leyti vera vegna mikils umferðarþunga, framúraksturs og hraða. Þetta sé sama ástæða og lá að baki breikkun Reykjanesbrautarinnar á sínum tíma.

Slysið í dag átti sér stað skammt frá Litlu kaffistofunni. Samkvæmt upplýsingum frá lögreglunni virðist vera sem ökumaður fólksbifreiðarinnar hafi ekið yfir á öfugan vegarhelming og lent þá framan á vörubifreið. Talið er að maðurinn hafi látist samstundis. Meiðsli bílstjóra vörubifreiðarinnar eru talin minniháttar.